BİR HƏZİN NƏĞMƏ
Hər həzin nəğməyə kövrəlirəm mən,
Daha nəğmələrə qulaq asmıram.
Gəlir, gəlsin payız, yağsın yağışlar,
Mən əvvəlki qədər daha susmuram.
Gedirəm yolların yoxuşu ilə,
Həmin yolda məni qorxular üzür.
Mən ki bu yerləri heç tanımıram,
Gözlərim ətrafı maraqla süzür.
Qalmısan yadımda, demirəm, yoxsan,
Bir az yaxındasan, bir az uzaqsan.
Közü külə dönmüş, külü sovrulmuş,
Mənə istiliyi çatmaz ocaqsan.
Oturub nələrin fikrini çəkib,
Bilsəydim canıma qəsd eləməzdim.
Ağır xəstəliyə, dərdə tapınıb,
Özümü sevginə qərq eləməzdim.
İndi başqalaşıb hisslər içimdə,
Şıltaq hisslərimə aman vermirəm.
Bəlkə böyümüşəm, qəribə gəlir,
Keçmişə bağlanıb, zaman vermirəm.
Burnuma illərin xoş ətri gəlir,
İstər payız olsun, istərsə də yaz.
Elə darıxıram, ürəyim əsir,
Sənin həsrətində üşüyür bir az.
SEVGİ BAŞQADIR
Məni çox istədin, sevə bilmədin,
Sevgiylə istəyin fərqi az deyil.
Bəlkə məndən öyrən həqiqətləri,
Istək sevgi qədər əlçatmaz deyil.
Sənə şirin gələn gözlə baxışmaq
Məhəbbət yolunda hünər sayılmaz.
Quru baxışlardan qığılcım qopub,
Od salıb ürəyə, cana yayılmaz.
Toplayıb özünü, bir fikrə gəlib,
Hisslərinə ünvan seçə bilmədin.
Ocağında yanıb, közdə qovrulub,
Eşqin alovundan keçə bilmədin.
Böyük inadına qarşı çıxacam,
Bağışla, qaçacaq ağzının dadı.
Cəfasız, fədasız, qurbansız olan,
“Sevgi” ola bilməz hər hissin adı.
ALLAH
Allah, nə istədim, hər şeyi verdin,
Özümdən narazı, səndən razıyam.
Gözütox, sadəlövh, şükürlü insan,
Mən də yaradandan yazan yazıyam.
Bir parça çörəklə, əzizlərimlə
Özümü dünyanın xoşbəxti bildim.
Onların varlığın, sağlığın görüb,
Dünyanın malını gözümdən sildim.
Elə arxayınam həyatda sənə,
Heç kimə bu qədər ümid olmaram.
Ürəyimdən keçən istəyimlə mən
Çarəsiz, ümidsiz, naçar qalmaram.
Şükür varlığına, şükür, İlahi,
Canımın yandığın necə bilirsən?
Mənə qan udduran, ürək yaxana,
Cəzanın ağırın seçə bilirsən!
Sən görüb tanıya bilirsən deyə,
Nəzərin ayrılmır sanıram məndən.
Bunu hiss edirəm hər duamda mən,
“İlahi dəyəri” alıram səndən!
ZƏHƏR
Sevgimə nə idi qatdığın zəhər,
Acısı ruhumu, hissimi çaldı.
Ölümə sürüyən xəstəlik kimi,
Sağalmaq bilmədi, canımda qaldı.
Ağrının təsiri qovurub məni,
Çəkdi öz yanına bütün diqqəti.
Şux idi qamətin sevgi önündə,
Bükübdür belimi eşqin xiffəti.
Ötəri görünən qarqara tellər
Boyanıb ağ dənə, əsir olubdur.
Dərdimin əlindən qocalıb vaxtsız,
Ah, gözəl gəncliyim niyə solubdur?!
Döndərdin üzümü, dönüb özümü
Tanıya bilmədim, bilə bilmədim.
Sən açan yaralar sağalıb, amma…
İzini könlümdən silə bilmədim.
TƏSƏLLİ
Ayrılıb gedirsən, təsəlli vermə,
Mənə təsəllinin bir xeyri yoxdur.
Sanki nə olubsa, ötəri olub,
Sənin gözün artıq sevgiyə toxdur.
Elə soyuqqanlı durub önümdə,
Güclə gizlədirsən sevinci üzdə.
Xumar gözlərində qəmi, kədəri,
Su kimi gəzirəm səhrada, düzdə.
Bu gün başımıza gələn bəlalar
Səbəbi sayılır soyuğun, qarın.
Sən gedə bilərsən, mən təkbaşına
Ağrısın çəkəcəm o yaraların.
Şərt onda deyil ki, yıxılsın dünya,
Təsəlli tapasan, bir ümid ola.
Ayrılıq məhv edə neçə sevdanı,
Səndə mənim üçün çıxmışdın yola.
Bu eşq parçalanıb sənin köksündə,
Sevgisi şübhəli, soyuq ürək var.
Nə mənim geriyə dönmək istəyim,
Nə təsəlli uman məsum mələk var.
SƏNLİ ARZULARIM
Sənli arzularım daha gözəldi,
Sevginin ətrini duyurdum hər an.
Toxuna bilmirdim, deyə bilmirdim,
Bu ağrı qəlbimi dəlirdi yaman.
Sığmazdı sevgimiz bənzətmələrə,
Göylərdə təsəvvür edirdim bizi.
Qoruyub, qovlayıb, uca tuturdum,
Deyirdim, silinməz bu eşqin izi.
Belə düşünürdüm, sən demə, səhvəm,
Sən istəyən kimi arzu doğulmaz.
Enisli, yoxuşlu həyat yolunda,
Acılar izini qoymasa, olmaz.
Arzuyla doğulan sevgi- məhəbbət,
Puç olan duyğudan nəsibin alar.
Qoy deyim, nə qədər qəbahəti var,
Sonu gözlənilməz peşmanlıq olar.
Güclə ayaqdadır, toxunsan, çökər,
Qayğısın çəkmədən soyuyub gedər.
İncədir, qırıqdır zərif telləri,
Bilmədən basarsan, məhv olub gedər.
