Eluca Atalının “Ənqa quşu – sonsuzluq axtarışında” kitabı uyğur dilində yayımlandı.
İsveçdə yaşayan Azərbaycanlı yazar Eluca Atalının “Ənqa quşu– sonsuzluq axtarışında” kitabı uyğur dilində İstanbulda yayımlanıb. Kitabın yayımını ərsəyə gətirən Doğu Türküstanın azadlığı yolunda mübarizə edən uyğur xalqının iki mücadilə insanıdır. Belə ki, əsəri azərbaycan türkcəsindən uyğur dilinə çevirən filologiya elmlər doktoru, şair Abduşükür Mühamməd, kitabın redaktoru isə Amina Sədəfdir.
Kitabın tanıtım mərasimi və imza günü isə 31 oktyabr 2025-ci ildə İstanbuldakı həftəsonu məktəbində Çinin istilası nəticəsində ağır basqılara məruz qalmış uyğur ailələrindən olan 7-13 yaş qrupundan olan məktəblilərlə keçirilmişdir. Əsər və müəllif haqda öncədən məlumat verən redaktor Amina xanım tərcümə üçün nədən “Ənqa quşu – sonsuzluq axtarışında” kitabını seçdiklərini açıqlamışdı. Müəllif, insan özünü necə dərk edə bilər? Özünə necə çata bilər? Harda yerləşir əbədiyyət və onu necə əldə etmək olar? kimi suallar qoyaraq, oxucuları ilə dialoqa girmişdir. Sonda balaca oxucularına kitabı imzalayan müəllif növbəti görüşü kitabın qarşılıqlı fikir alış-verişində keçməsini arzulamışdı. “Oxucu – yazarın laboratoriyasıdır.” deyən yazarımız, balacalarda əsərin nə kimi hisslər oyadacağını səbrsizliklə gözlədiyini onlara bildirmişdir.
