Azərbaycan ədəbiyyatında mühüm hadisə – Sona Abbasəliqızının 4 cildlik “Seçilmiş Əsərləri” işıq üzü gördü

Azərbaycanın tanınmış yazıçısı-şair, publisisti və tədqiqatçı Sona Abbasəliqızının illərlə formalaşdırdığı zəngin yaradıcılıq irsi nəhayət ki, 4 cildlik “Seçilmiş Əsərləri” adı altında oxuculara təqdim olundu.
Bu çoxcildli nəşr Azərbaycan ədəbiyyatında özünəməxsus yer tutan bir müəllifin həyat, vətən, dil, şəhidlik, analıq, dostluq və zamanın ağrı-acılarını ehtiva edən dərin məzmunlu əsərlərini bir araya gətirir.
Hər cild özündə fərqli ədəbi üslub və tematik qatları əks etdirir:

I cild – Yaşanmış romanlar və dərin psixoloji təhlillər
II cild – Hekayələr, publisistik mətnlər və həyat mənzərələri
III cild – Vətən, şəhidlər, ana və dil mövzusunda yazılmış şeirlər
IV cild – Oda janrında yazılmış dərin fəlsəfi-poetik nümunələridir.
Əsərlər yalnız ədəbi deyil, həm də tarixi və mədəni yaddaşı yaşadan sənəd mahiyyəti daşıyır. Müəllifin Qərbi Azərbaycandan (Göyçə mahalından) məcburi köçü və o torpaqlara bağlılığı bu kitabların emosional yükünü daha da artırır.
Sona Abbasəliqızı həm Azərbaycan Yazıçılar Birliyinin, İraq türkmən Yazıçılar birliyinin, Gürcüstan və Qırğızıstan,Qazağıstan Yazıçılar İttifaqlarının üzvüdür. O, Avrasiya Sanat Kültür və Edebiyat Federasyonu – ASKEF-in Azərbaycan başkanı və Mərkəzi Asiya üzrə təmsilçisidir. Onun ədəbi fəaliyyəti təkcə milli sərhədləri aşmır, həm də türk dünyasında geniş oxucu auditoriyası ilə paylaşılır.
Yeni nəşr olunan 4 cildlik toplu SOCAR-ın dəstəyi ilə işıq üzü görüb və bu, müasir dövrdə mədəniyyətə göstərilən dəyərin nümunəsidir.
Ədəbi ictimaiyyət, oxucular və tənqidçilər bu əsərləri artıq böyük maraqla qarşılayır. Kitab təqdimatları və beynəlxalq konfranslarda müəllifin çıxışları yaxın günlərdə də davam edəcək.

Yeni nəsil ədəbi yaddaş – Sona Abbasəliqızının qələmi ilə.