Qorxulu yuxulardan
Dodağım uçuqlanar,
Əllərin qəhvərəngi ovcumda muncuqlanar,
Ömrüm hansı baharda səndə tumurcuqlanar,
De mən də o baharda könlümə əkim səni.
Hər cür haqqa sahibsən,
O dediyim gücü ver,
Sözlərinin içindən seçib ən ülgücü ver,
Hansı dildə anlaşaq, mənə bir ipucu ver,
Sonuncu nəfəs kimi içimə çəkim səni.
Yıxılaram-duraram,
Can ki, var sələmədi,
Deməsəm də bilirsən, əsas məsələ nədi,
Ürəkağrısı boyda çəkdim bəs eləmədi,
Nə boydadı niyyətin, nə boyda çəkim səni.
Sonda səni sarsıdar,
Etiqadlara baxma,
Sən qapalı çiçəksən,dönüb yadlara baxma,
Tərcümeyi-haldı də, başqa adlara baxma,
O qədərlər içində bilmişəm təkim, səni..
Yelqanadlı atların,
Bilməm hansına min, gəl…
Bəlkə bu son ümiddi, bu son şansına min, gəl,
Bitmək üzrədi ömrüm, ambulansına min, gəl,
İki kəlmə sözüm var, gəl görüm, həkim, səni..
***
Ha gedər, yetişməz mənzil başına,
Adam bu yollarda azar, görürəm.
Neçə külüng vuran haqq adamını,
Tamamən canından bezar görürəm.
Efirdə çox şeyin reklamı baldı,
Bu artıq bizimçün bir adi haldı,
Səadət bu yerdə boş bir xəyaldı,
Kimə baxıramsa məzar görürəm.
İşimiz hər kora, hər lala çıxır,
Ürək qanımızdan tər lala çıxır,
Yolumuz hər yandan dəllala çıxır,
Hər yerdə bir açıq bazar görürəm.
Ömür, ömür deyil, məzəxanadı,
Həyat dirigözlü cəzaxanadı,
Hər addım başında əczaxanadı,
Həkimdən daha çox azar görürəm.
Kimdi göy əskiyə bu günü düyən,
Baxıb qəzəb atım gəmirir yüyən,
Ölkədə nə qədər pula şöngüyən,
Yala mırıldayan yazar görürəm.
