Harda etdim yanlışı?
Ürəyimdə düyünlənən sözləri,
Qələm çəkir dara bir-bir gözümdə.
Yorulduqca düşüncələr könüldə,
Anlamıram nə baş verir özüm də.
Yıxılmağa yer axtarır xəyallar,
Arzuların ağuşunda əsirəm.
Təsəllimə aram gəzir royalar,
Bilmirəm ki, harda yolun kəsirəm.
Bir isbatsız teoremtək yanıldım,
Təsdiqini gözlədikcə ümidin.
Həqiqəti aydın ikən danıldım,
Yoxluğunu izlədikcə ümidin.
Heç bilmirəm, harda etdim yanlışı,
Yarı yolda inkar edir həyat da.
Sanırdım ki, qazanmışdım yarışı,
Mən bu yalan, yanlış dolu həyatda.
Həyat yolum bir tıxacda dayandı,
Nə biləydim, vəfası kəm dünyadı.
Ümidlərim qaranlığa boyandı,
Bilmədim ki, arzuları xülyadır.
HƏYAT MƏNİ YAXŞI BAŞA SALDI Kİ
Həyat məni yaxşı başa saldı ki
Dəyərimi dəyərindən salmışam
Dəymədiyi hansı zərbə qaldı ki?
Mən dərsimi həyatımdan almışam
Günlərimi göy əskiyə bağlayıb
Ömür gedib, tən yarısı hədərdir
Mənə bəxti qara günçün saxlayıb
Necə deyim bu talehdir, qədərdi
Mən ömrümü özüm dara çəkmişəm
Kipriyimin qıyısında məhbusam
İntizarı çoxdan qəlbə əkmişəm
Nə fərqi var indi belə məyusam
Ən son ölən ümidlərdir deyirlər
Mənsə onu özüm ağa bükmüşəm
Bəxti kəmlər qəmdən libas geyirlər
Yorulmuşam, can evimdən çökmüşəm
