Xəzan küləyi
Niyə payız gələndə ürəyimə qəm dolur?
Dərd-kədər məni sıxır, gözlərimə nəm dolur.
Elə hey həsrət ilə gözüm yollarda qalır,
Bir nöqtəyə dikilib sakit xəyala dalır.
Baxıram ağaclardan tökülən yarpaqlara,
Kövrəlirəm, yaşlarım süzülür yanaqlara.
Al-əlvandır küçələr, niyə insan darıxır?
Qarlı, soyuq qış gəlir, bəlkə də ondan qorxur?
Üşüdüb qəlbimizi əsir xəzan küləyi,
Xəzəlin xışıltısı titrədir hey ürəyi.
Çıxsa da qızıl günəş, artıq yox hərarəti,
Yorulub sanki o da, qalmayıbdır taqəti.
Bənzəyir insan ömrü necə də fəsillərə,
Qışdan sonra yaz gələr nəsildən-nəsillərə.
Yoxsan
Ömrüm düşdü duman-çənə,
Tükənirəm, niyə yoxsan?
Ehtiyacım vardı sənə,
Tükənirəm, niyə yoxsan?
Sevincimi məndən aldın,
Arzularda yarım qaldın,
Ümidimə kölgə saldın,
Tükənirəm, niyə yoxsan?
İnanmazdım belə olar,
Gül camalım vaxtsız solar,
Ürəyimə kədər dolar,
Tükənirəm, niyə yoxsan?
Demişdin ki, bir az da döz,
Harda qaldı verdiyin söz?
Ağlamaqdan kor olub göz,
Tükənirəm, niyə yoxsan?
Gözlərim də yuxu yatmır,
Xatirələr başı qatmır,
Yaşamağa səbrim çatmır,
Tükənirəm, niyə yoxsan?
Ürəyimcəsən
Ay mənim ömrümə yaraşan qadın,
Dəyərin böyükdür, zərif, incəsən.
Dilimdə əzbərdir tək sənin adın,
Könlümə yatmısan, ürəyimcəsən.
Ay mənim qəlbimi odlara yaxan,
Bil ki, sən hamıdan əzizsən mənə.
Süzüb gözlərini gizlincə baxan
O ürkək baxışlar yaraşır sənə.
Ay mənim sevincim, ən şirin anım,
Sevgi, məhəbbətə verirəm önəm.
Yaşamaq səbəbim, sən mənim canım,
Qoyma həsrətindən şam kimi sönəm.
Bir eşq
Düşünməzdim könlüm sənə yar olar,
Bir eşq təki arzularda çağladın.
Bu gen dünya sevənlərə dar olar,
Bir dərd olub bağrım başın dağladın.
Sevgim çiçək həsrətindən o soldu,
Əvəzində ürəyimə qəm doldu.
Göz yaşıma qıymaz idin, nə oldu?
Bir sel kimi gözlərimdə ağladın.
Sönüb artıq yanan qəlbdə közüm də,
İntizara yox canımda dözüm də.
Uca dağın vüqarıydın gözümdə,
Bir qaya tək yollarımı bağladın.
Sən olmadınmı?
Sevgini qaparıb bu ürəyimdən,
Məni dərdə salan sən olmadınmı?
Həsrətini sancıb düz kürəyimdən,
Məni dərdə salan sən olmadınmı?
Əllərim üzülüb vüsala çatmır,
Ruhum göydə gəzir, cismimə yatmır.
Deyəsən ölmüşəm, ürəyim atmır,
Məni dərdə salan sən olmadınmı?
Gözlərimin yaşı köksümə dolub,
Qəlb evim kimsəsiz, viranə olub.
İntizardan rəngim, ruhum da solub,
Məni dərdə salan sən olmadınmı?
Dərdimi anlayıb insaf etmədin,
Bir imdada çatıb ünə yetmədin.
Nə bir yolluq gəlib, nə də getmədin,
Məni dərdə salan sən olmadınmı?
